Friday, September 22, 2006

ESTRANGHERO

"I want to go home!"
-- anek-ek ti maysa baket iti nursing home.


Adda umaw-awag a timek a tumpuar iti kaunggam
Daytay timek ti panangilantip manen ti dapan
Iti bagi ken kararua ti bukod a pagtaengan,
Iti daytoy laeng a ritual a mariknam
Ti namayengmeng a talinaay ti kinapudno
A nasken a sublian latta dayta nagpanawan a disso.

A, ta uray dagiti salmon, subaenda dagiti agus ken baresbes
Agdaliasatda ginasgasut a milia, dida mabannog
Makasublida laeng disso a nakaispangayanda!

Kunaek kenka, ina, maysaak met a ganggannaet a kas kenka
Ket rumkuas met ti tarigagay a sublian, agepan
Ken ilantip manen toy kararua iti disso a nakaidulinan ti kadkadua...
Ngem addaak ditoy nga agngatangata, napupok kadagiti adu a pangngadua:
Ti bassit a balayko, a pinanawak a rutrot ken agrakrakaya, gistayanen marba,
Kukuan ken pagturayan dagiti marabutit, kiteb, karasaen ken ipes?

Kayatmon ti agawid, ina, kas ti regget ti panagawid dagiti salmon nga agitlog!
Ngem siak , addaak iti nagtengngaan dagiti adu desdes
Diakon ammo ti dana a mangitunda kaniak iti taeng a pagawidak?

8 Comments:

Blogger rva said...

naragsak a panagsubli a panagiblag iti putar, gayyem abril! saan a kinaestranghero dagiti isusubli ken panagsubli, saan nga estranghero ti panagkatangkatang, saan nga estranghero ti panaglagip ti lagip.

5:02 AM  
Blogger abril said...

padpadasen latta ti agputar, gayyem roy, no adda waya...outlet ti iliw ken ila dita a kunada.

10:48 AM  
Blogger abril said...

This comment has been removed by a blog administrator.

2:19 PM  
Blogger jfi said...

kas kadagiti kannaway nga agsapsapul iti taraonda iti sabali a disso agsubli ket agsublidanto iti naggapuananda, ta iti pusoda maysa laeng daytoy a panagbaniaga ngem ti im-imetenna ti ladawan ti napanawanna.

6:41 PM  
Blogger abril said...

kusto ta kunam, jake, adda tay maysa a mannananiw a nagkuna, "Addaak ditoy Laud ngem toy pusok adda idiay Daya..."

5:59 AM  
Blogger ariel said...

Anian a nakaan-annayas a kapampanunotan!
Saan a matay ti kina-Ilokano gapu kadakayo.

10:31 PM  
Blogger ariel said...

anian, pinaturogmo manen, daytoy blogmo, ading! merry white christmas dita canada.

4:04 PM  
Blogger abril said...

agyamanak, manong, sapay ta nawadwad met a grasia ti sumangbay kenka iti baro a tawen. adu ti nakadidigraanmi ditoy BC itay napalabas a tawen, manong, aglalo iti bulan ti Nobiembre 2006, nabagyokami(storm) ditoy sa simmaruno iti napuskol a niebe; ngem kaasi ti Apo umang-angeskami pay laeng.

4:38 AM  

Post a Comment

<< Home