Monday, January 17, 2005

SUNGBAT KEN NI INA

“Didakami liplipatan ditoy Filipinas, wen."
-unnoy ti maysa nga ina.

patgek nga ina,
diyo koma gamden a panunoten
a markas ti kawar a nakaigalutan
dagiti lagipmi kadakayo
ditoy simmangbayanmi a ganggannaet a disso.
saksimi dagiti kawaw a rabii a mangsungsungka dita
no kasta nga iliktadyo dagiti agdan, itangepyo dagiti tawa
kadagiti maam-amak a sardam a napnot’ taul ken alang-ang,
wenno lukag-putok ti badigard ni apo mayor a nabartek ken agpagunggan,
a mangsallin naimnas a ridepyo, uray nabugguongan
la a bulong ti marunggay ti pinangrabiiyo...

ilislistami latta dagiti agtinnag
a tinukel ti lua dagiti balo ken ulila
a kailiantayo a mangsawsawar kadagiti ammada
a nayulog kadagiti nasipnget a sardam,
a sapsapulenda iti nagmanto a langit
daydi maudi nga arakup, daydi maudi a pakada:
“annak, agsingsingpetkayo, isublidakto met laeng…”

agmuttalengkami latta iti lagip
dagiti agpaspasuso nga inna
iti sanguanan dagiti nanumo a dulang wenno lamisaan
a mangur-uray kadagiti amma wenno annak
a nagsawar iti nabangles a makan
kadagiti pagbasuraan da apo baknang…

agkibbayokami latta iti damag
maipanggep kadagiti appotayo nga agtuturay
a nangikisap iti innapuy ti namnama,
a nangarub-ob iti dinengdeng ti hustisia,
ken nangati iti malabi ti danum ti ayat ken asi,
potahe a paglalanglangan koma
iti mangurkuranges nga ili.

malaglagipdakayo latta, patgek nga ina
ket dinto aggibus ti sirkulo ti ayat
iti laksid ti ipapanaw ken panagkatangkatang,
iti panangsapsapul iti sungbat ti doliar, euro, yen ken riyal
kadagiti saludsod ti pisos a di masarakan
iti disso a nakaipasngayan…



13 Comments:

Blogger ariel said...

dear abril:
bravo, adda manen iramanko iti literature of exile a proyektok.

1:00 PM  
Blogger abril said...

agyamanak unay, manong. an-anusandak kadi nga iwanwan, manong, bareng pudnonton a daniw dagiti sumarsaruno a putaren..komustan ti writers'conferenceyo dita hawaii, manong? maragsakankami man, manong, ta addaka a mangiyam-ammo kadagita foreign writers ti literaturatayo a saluyot!

9:56 PM  
Blogger joel said...

gayyem abril,

Unayen ta nagtig-abak a nangbasa, gayyem. Ikkam kadi latta a ti agdaniw ta kadagiti laengen aringgawis dagiti verso, mabalin a makitatayo ti kinasiasinnotayo.

jbm

6:38 AM  
Blogger abril said...

agyamnak unay, gayyem jo. dakkel unay a pagyamanak ken ni mang ariel ta isu ti nangisungsong kadatao nga agsurat iti kastoy a tema..

1:33 PM  
Blogger ariel said...

dear abril:
anian ta mangrugin ti spring ket dika metten agdaniw! napananen dagiti sabsabong ti canada?
manong A

PS-
umaykanto man ketdi agdaniw ditoy 2006 International Iluko Conference on Language, Culture, Humanities, Arts, and Research ditoy U of Hawaii-Manoa inton Agosto 2006. Wen, kunam kadin uray ta mabalinmo met lattan ti ag-Amtrak.

1:27 PM  
Blogger abril said...

wen, ngarud, manong, diak metten matiliw ti aginakbay nga ayamuom dagiti sabong ti daniw nga agukrad iti paraangan ti darepdep...aya, nagsayaaten ken agyamanak unay ta awismo, manong, diak pay maisigurado, ngem padasek ketdi nga isaganaan daytoy bareng ngarud makaumayto datao palubos ti Apo.

5:55 PM  
Blogger ariel said...

Dear Abril,
ala ngarud. ditoytayo honolulu into agosto 2006. rautentayo dagiti musa, ala!
Manong A

1:45 PM  
Blogger asseng said...

mang abril,

komustan? nagulimekka metten?

asseng

8:02 PM  
Blogger abril said...

nasayaat met, ading, pasensiakan no ita la a masungbatanka ta ita man la a masangon a tugawan toy komputieren. komusta ti semana santayo dita?

10:25 PM  
Blogger asseng said...

diak nakaawid idi semana manong ta narikut ti aglugan.

nupay kasta, naulimek met ditoy manila ta diak rimrimuar, hehe.

dikay kadi met umay makigumil?

asseng

12:53 AM  
Blogger abril said...

napalalo a kayatko koma met ti sumuknal dita gumil ngem nagrigat met ti agurnong ti pagplete, ading. uray ditoy permi a tumaytayok ti cost of living a kunada. ala, bagik lattan ti agtiltilmon iti apalko kadakayo a mapan makigumil.

7:22 AM  
Blogger abril said...

napalalo a kayatko koma met ti sumuknal dita gumil ngem nagrigat met ti agurnong ti pagplete, ading. uray ditoy permi a tumaytayok ti cost of living a kunada. ala, bagik lattan ti agtiltilmon iti apalko kadakayo a mapan makigumil.

5:18 PM  
Blogger jim agpalo, jr. said...

nagmamayat ketdin dagitoy a dandaniwmo, abril! kaasitgan kaniak daytoy maipapan iti ina (ken inangmo) ... kaay-ayok dagiti daniw a maipapan iti ina... isu a duan kadagiti "anti-mosquito aegyti" a tangtangadek iti nagtaud iti maipapan iti ina...

garuden, tira latta!

7:36 PM  

Post a Comment

<< Home