Tuesday, December 21, 2004

KADAGITI ALLON TI JERICHO BEACH*

ditoy ganggannaet nga aplaya ti jericho beach
bilangek no kua dagiti sumangbay nga allon
ket bay-ak ida nga agkurno iti sakaanan ti sasainnek
dagiti iliw ken segga nga agburak iti barukong…
hala, umaykayo, dakayo nga allon,
riknaenyo ti bara ‘toy nagsiding a dapan
kayumanggi a gabat nga agkatangkatang…
hala, umaykayo, allon, ta ipaw-itko kadakayo
dagiti mensahe ti lua ti diaspora a naitibnok
iti danum a namagsaip iti laud ken daya..
hala, yanudyo dagitoy a sasainnek..
yanudyo dagitoy a segga...
yanudyo dagitoy nga ila
ket yagepyonto koma a silalailo
iti bangir nga aplaya ti ingungotek a daga
a yan ti nakaidulinan daydi kadkadua…
idanonyo koma nga iti laksid ti ipapanaw
ti pusok ken espirituk nabati kenkuana..
idanonyo koma nga iti laksid ti sam-it
dagiti agaruyot a gatas ken diro
sapsapulen latta dagiti nakairuaman a raman
ti nagbiagan a nanam ti tuyo ken bugguong..
idanonyo koma nga iti laksid ti lukneng pagiddaan
il-iliwen latta ti imnas dagiti tagainep
iti nasileng a datar daydi nanumo a kalapaw
a siraragsak a nagtakder iti dumna't karayan ken kataltalonan..
idanonyo koma nga iti laksid kinadaeg-buya
dagiti agtinnag a niebe iti winter
ken panagukrad dagiti sabong ti cherry iti spring...
dinto agkupas ti buya ti panagraraep iti nepnep
ken ti di agmawmaw nga ayamuom ti sampagita iti kalgaw...
hala, umaykayo, dakayo nga allon,umaykayo
ta ipaw-itko kadakayo dagitoy a mensahe
iti testamento ti kari
ti maysa nga agkatangkatang a patneng nga ilokano!

* nalatak a beach iti Vancouver, BC, Canada.

13 Comments:

Blogger ariel said...

dear abril,
napintas daytoy a daniw. the emotions are raw and fresh and the images fresher. the nostalgia is deep and tender. it is an honest-to-goodness poem of the diaspora--daytay pannakaipalpalladaw ti puli. i would like to include this in my studies on the diapora literature, if you do not mind.

happy holidays.
Manong Ariel

7:36 PM  
Blogger abril said...

manong, agyamanak no maikarkari 'toy daniwko..ken Dios pay ti agngina iti agtultuloy a pammakaritmo.

9:40 PM  
Blogger joel said...

gayyem abril,

itay basbasaek toy daniwmo, kasla naipalagip kaniak dagiti sasainnek daydi Lilo Rizal idi adda idiay Heidelberg idi daniwanna dagiti sabong sadiay.

ah, tapno makadaniw ti maysa a parsua iti kastoy, masapul nga umadayo, di ngamin? Dakami nga adda ditoy, kasla dimi met ikabkabilangan dagiti ordinario a buya ditoy ilitayo.ngem apo, no umadayokam met ngatan?

ala man pay, gayyem. dawatek man met nga usarekto toy daniwmo iti panangisuromi kadagiti ubbing nga agdaniw dita Youth Creative Writing Center.

jbm

9:36 PM  
Blogger abril said...

kustoka, gayyem jo, daydiay daniw ni apong jose a "to the flowers of heidelberg" ti nagbasarak. kinapatpatangna sadiay dagiti sa a pangipeksaanna met ti iliwna iti ingungotenna a daga, isu a dagidiay met "allon ti nangipeksaak" iti ilak. inusarko ti "allon" a simbolo ta kasta ti kayarigantay a filipino, nawalay ken ti la sangsangladanna a disso. 'tay kuna ni mang ariel a diaspora. wen, duma a talaga ti iliw a mariknam, gayyem, no mayadayoka iti pagiliam, kastay kunadan, "amidst palaces and places i may roam, there's no place like home..." ala, gayyem, pakaidayawan 'toy numo iti pannakaikarkari 'toy daniwko. ala, gayyem, saluduanka iti dayta napintas a proyektom. nakautang kenka ti literatura-ilokana.

3:22 PM  
Blogger rva said...

nagpintasen, gayyem abril!

mayat sa a talaga no maidakdakka iti ganggannaet a daga ta gapu iti adu nga ila ken iliw adu met ti matiliw ken maala a daniw, hehe!

nagasat ken natalingenngen a 2005, gayyem!

6:37 PM  
Blogger abril said...

agyamanak, gayyem roy, iti agtultuloy latta a pammakarityo. dakkel nga utangko kadakayo a diakto pulos mabayadan/masubadan iti panangkibinyo manen kaniak tapno subliak manen nga adaken ti dana ti panagsuratan bareng makasursuronto met la datao, gayyem. ala, nagasat a baro a tawenmo met, gayyem, agraman ti sibubukel a pamiliam.

8:08 PM  
Blogger ariel said...

dear abril,
yagawam latta, ading. nakapimpintas dagiti gapuanam.
try figuring out though why many of us leave the country. unearth the reasons for this exile from a holistic point of view. for instance, while i subscribe to the idea that there is that economic reason providing a ground--and base, if you want--to this phenomenon of exile, we need to plumb and tap into some other dimensions, such as: the metaphysical (i.e., questions of existence), the psychic, etc.

in practical terms, how does this relate to your "beach poem" above? simple. exiles like us cannot just go on romanticizing nostalgia for its own sake. while the raw emotions can be salvific and truthful, they must be also interpellated, questioned further, cross-examined. i think that rizal hinted at this in the "flowers" poem.
your poem has succeeded in this light but i will ask you to keep on with the cross-examination and interpellation. alright?
Manong A

PS-
naragsak a baro a tawenmo dita canada.

1:23 AM  
Blogger abril said...

anian, manongko, a nagpintas ti komentom! daytoy ti nabayagen nga ur-urayek nga iburaymo koma. kasapulak a talaga ti nalaing a kritiko a kas kadakayo tapno dumur-as met dagiti gapuanan. manen, manong, agyamanak unay kadagita singasingyo.

nagasat met a baro a tawenyo dita California ken dagiti ingungotem a pamiliam nga adda idiay Filipinas, sapay ta makapagdedennakayo koman iti mabiit.

11:42 PM  
Blogger ariel said...

dear abril,
alright. and thank you.
ikasam latta, ading, tapno maisuratmonto dagiti riwriw pay nga obra maestra. and they should be beyond rizal.
happy new year!

by the way, you may be interested to look into my rizal essay in my blog, "dissecting". modesty aside--and i have to tell you now that perhaps you may be able to pick up something from there about the rizal that we should to keep on interpellating--this essay won the grand prize in the recently concluded 108th anniversary of rizal martyrdom. the celebration/ceremony was held here in LA on Dec. 29. it is a bit long--about 2000 words (about 8 manuscript pages, but i hope it is worth you time).

manong A

2:38 PM  
Blogger abril said...

wow, manong! congratulations ngarud! we are so proud of you, manong, ta addakay a mangitagtag-ay kadagiti ilokano a mannurat!

6:57 PM  
Blogger ariel said...

Dear Abril,
no sweat. i want to read more of your masterpieces.
ala, agikur-itka latta. the essay espouses a critical frame on how we are supposed to view many things.
i though that since you are into--and plumbing--the rizalian framework, baka no adda mapidutmo, kunak man. ngem baka, ading, a. let your mind and imagination soar beyond any of us. i think that that is your moral imperative.

all for the best,
manong a

4:05 PM  
Blogger jim agpalo, jr. said...

mayat, abril! saan laeng a muging ti mataraona, pati pay kararua...

11:37 PM  
Blogger abril said...

agyamanak unay, mang ariel, mang jim...hmmm, bimmarbarotawenan a din san man manaynayonanen ti iblagen...ay, biag ti exilo a kuna ni mang ariel, kasla panniki a maturog iti aldaw, nakamulagat iti rabii-he-he.

7:51 PM  

Post a Comment

<< Home