Saturday, October 16, 2004

MAWAWAK

adda sugatmo a di maagasan
a di parnuay ti saplit,
korona a siit,
natarumamis a lansa. . .
iti krus, imkiska: mawawak!
ngem di nasukal naalsem a suka
ta sadiay mara, napait ti danum
a para kenka, awan met ubbog
agburayok iti bantay golgota!
ah! adut' lansa ti inhustisia
a naipalok kadagita ima ken sakam,
adu ti siit a koronam
a sinangal ti bisin-dayaw
pilato ken pariseo iti pagiliam,
adu a malo ti linak-ammo
sukat ti rebolusion-ayat nga impagnam,
adu a saplit ti nanglapgis lasag
supapak iti wayawaya ni barrabas,
adu ti sugatmo a di maagasan
ket agnunog saem iti pusom a sinalput
pika dagiti hudas iti berso ken sursurom
iti krus imkiska: mawawak!

--naipablaak iti Bannawag, Marso 28, 1994.

0 Comments:

Post a Comment

<< Home