Saturday, October 16, 2004

DUNG-AW NI KAYUMANGGI A MADONNA

ala, anakko, mangankan. . .
kunnotemon ti segget ti pegpeg
sagut dagiti butiog a mago
apagmo kano iti pinandayda a kaasi
iti senado ken kongreso. . .
ay, anakko, di kan sa man makakaan
iti buyok ti estero
'toy barongbarong a kulluongmo
a din sa man sirayan ti kiray
bituen iti nagmanto a law-ang. . .
sennaay ti ayug-paskua, anakko,
iti ulpit dagiti herodes
kadagiti palasio a nagarbo,
agrennekda a mangan iti kinalabon,
aglemmesda kadagiti istetsaid nga arak
idinto a dagiti murkatda a
maibelleng idiay smokey mountain
ur-urayen matmatayen a lazaro. . .
ay, anakko, adu dagiti krus
a baklayem iti panagdakkelmo--
ti krus ti pedopilia. . .
ti child abuse. . .
ti droga. . .
anakko. . . tumaud pay ngata
ti bandos a bagnos dagiti nayawyaw
a mago ken herodes iti panawenmo?

2 Comments:

Blogger jim agpalo, jr. said...

ne, mayat man abril!

ikkam latta!

6:18 PM  
Blogger abril said...

ty, mang jim, nabayagen a lebben dayta ta dimi met ammon ti agputar. saan sa laengen a "nagpauyo ni musa" (ne, bulodek ta liniayo), nagtawatawen ket din sa met makasublin.

3:54 PM  

Post a Comment

<< Home