Saturday, October 16, 2004

100 ISLANDS ITI AGKIAMKIAM NGA AGMATUON

sapulek ita ti kaipapanak ditoy dennam
kadagiti allon nga agpasag iti agmatuon
iti gayebgeb kalgaw agkiamkiam a darikmat
itaklinko kenka masmasnaayan a kararuak:
iti igid aplaya ti quezon island
garakgakan ti ubing pisaw-allon:
ganggannaet a lang-ay a di mananam
dagiti natagibi sibay basuraan
adda nalawa a danum baet tunggal isla
tinukel-rosario awanan linas kayariganda
pinagsisina ngata ida ti ulpit ti panawen?
iti beddeng tunggal parsua
adda nangato a bakud a di makita
kunatayo: awan tao a kas puro
ngem apay a kayattayo madidios a tattao?

itan, nasapulak kinataok ditoy dennam
itan ta nainaigkon riknak a masmasnaayan
daniwak ita ti biag dagiti maparparigat
ipulongko ti anek-ekda kadagiti allon
bareng agmaymaysada a rumkuas a dalluyon!

-naipablaak iti Bannawag, Hulio 15, 1996
(Daytoy man piman a daniw ti pakalaglagipak iti daydi maudin nga itatabunok iti Komperensia ti Gumil a naangay iti Ecohill Resort a kukua ti patron ti literatura-saluyot, Mr. Rene Ragunton, iti Lareg-Lareg, Malasiqui,Pangasinan. Piman agwalo a tawenen a diak simmuknal. . .)

3 Comments:

Blogger rva said...

diak a nakapan idi dita handred aylands... iti la maudin nga aldaw ti kombension ti naabutanmi idi ken atanud dln .

ania kadi a tawen a nagpa-canadakayo?

rva

11:57 PM  
Blogger abril said...

idi hunio, 1998, gayyem, manipud idin di metten masango nga ilagid 'toy ingget ngudelnan a pluma.

3:48 PM  
Blogger jim agpalo, jr. said...

no dika nakaumay idi roy, dimo ngarud naramanan ti kakasla takiag a paltat africa, hehehe!

daydi met a panawen iti panagsublik manipud iti radio...
nabagas daydi a tawen ta adda ti tallo a bettek a premio

11:27 PM  

Post a Comment

<< Home